எதை நிந்திப்பது?

அத்யாவசியம் உருவாக்கிய தானியம்
தானியங்கள் உருவாக்கிய நாணயம்
நாணயம் வடிவமைத்த வணிகம்
வணிகம் நடைபெற பங்கு சந்தை
பங்கு சந்தை செயல்பட வங்கிகள்
வங்கிகள் நிர்ணயித்த செல்வந்தர்
செல்வந்தர் ஆட்டிவைக்கும் அரசியல்
அரசியல் கட்டுப்படுத்தும் சமூகம்
சமூகம் சீர்குலைக்கும் இயற்கை
இயற்கை சீற்றத்தில் நீர்நிலம்
நீர்நிலத்தோடு அழியும் வாழ்வாதாரம்
இதில் எதை நிந்திப்பது?

எதற்காக?

பொருள்.. ஈட்ட வேண்டும்.. சுற்றத்திற்காக
இன்பம்.. சுகிக்க வேண்டும்.. சுயத்துக்காக
கல்வி.. பயில வேண்டும்.. தகவற்க்காக
அறிவு.. தீட்ட வேண்டும்.. வளர்ச்சிக்காக
ஆற்றல்.. அறிய வேண்டும்.. அவசியத்திற்காக
வீரம்.. பழக வேண்டும்.. தற்காப்புக்காக

சான்றிதழின் மதிப்பென்ன?

களம் காணா வாய்ச்சொல்லான்
நீ வீரன் என்று சான்றளித்தல் தகுமா?

மூடர்கள் கூடி அறிவாளி
என்றிட நின்னறிவு ஒளிர்ந்திடுமா?

உன் அறத்தை அளவிட
எவ்வொறு கோலேனும் இங்குண்டா?

உன் நிதானம் அளப்பவன்
உன்னுடன் நிதம் வசித்தானா?

உன் ஸ்திரம் மதிப்பிடுவோர்
உன்னை செதுக்கிய உளிகள் அறிவாரா?

வெற்று காகிதங்களை ஈட்டி
சான்றிதழ்கள் என்று களிப்பாயா?

அளிப்பவனின் கருத்தும்
அளப்பவனின் செருக்கும் உன் ஆளுமையா?

பத்தோடு பதினொன்றாகி மற்றொருவன் கனவை
நிறைவேற்றுவது உன் இலக்கா?

சான்றோன் சான்றாண்மைக்கு
சான்றிதழ்கள் தேவையா?