அழகு அறிவு வீரம் ஆற்றல்

அழகு அறிவு வீரம் ஆற்றல்
அறத்தை மீறி செயல்பட தூண்டும்
அந்நியனையும் கவர்ந் திழுக்கும்
விளம்ப விளம்ப மகிழ்விக்கும்

அழகு அறிவு வீரம் ஆற்றல்
மனித வளர்ச்சியின் தூண்டுதல் ஊற்று
ஓர்யுக புகழின் அடிப்படை ஆணிவேர்
மனிதன் நிகழ்த்திய பிரளயங்களின் மூலம்

கண்டவுடனே ஈர்க்கும் அழகு
கேட்க கேட்க வியப்பளிக்கும் அறிவு
காலம் ஏற்பட போற்றப்படும் வீரம்
முடிவின் சாதகத்தில் அறியப்படும் ஆற்றல்

அழகும் ஆற்றலும் ஓங்க அறிவு தேங்கும்
அழகோ அறிவோ ஓங்க வீரம் தேங்கும்
வீரமும் ஆற்றலும் ஓங்க அழகை கவரும்
அறிவும் ஆற்றலும் ஓங்க சமூகத்துக் குபாயம்

பொறுமை ஞானம் மனஸ்திரம்
ஷரத்தை பகிர்தல் பயில்வித்தல்

போன்ற இயல்புகள் மெருகூட்டுபவை!
விளம்பத்தகா! சாண்றோனன்றி அறியப்படா!

யானறிந்த உறவினிலே!

யானறிந்த பெண்டிரிலே முன்னோடி
எனை ஈன்ற தாய்
முதன் முதலே கையில் ஏந்திய
அவள் அத்தை என் ஆச்சி
உச்சி முகர்ந்து கொஞ்சி வளர்த்த
என் பாட்டி
ஓடி விளையாடி பகிர்ந்துண்ட
என் அக்காள்
தாயோ தமக்கையோ என்றிருந்த
என் அத்தையார்
இள வயதில் மனமீர்த்த
அரு மங்கையர்
விரும்பி மணந்து சகித்தும் தழைக்கும்
என் மனையாள்
நிதம் ஆணவம் அழித்து அன்பை ஊற்றும்
என் மகள்

யானேற்ற உறவினிலே
மிக ரசித்து சுகித்தது தந்தையாக!
என்னை சுற்றி சுழன்ற என்னுலகம்
அவளை சுற்ற நகர்ந்தது

என் பசி என் வலி
பெரிதென்றிருந்தேன்
துச்சம் என கண் இமைப்பில்
உணர்த்தினாள்

இலக்கென்ன, வாழ்வின் அர்த்தம்
எது தர்மம், எங்கு மோக்ஷம்
என்ற தேடல் ஊற்றெடுக்க
என் மடியை சிறுநீரால் நனைத்து
புண் முறுவல் பூத்து
நிகழ்காலத்திற்க் கிழுத்தாள்

நான் வெம்பி அழுத நாட்களை
விரல் விட்டு எண்ணலாம்
அவை யாவும் விமானநிலையத்தில்
உன் விரலை வருடிப் பிரிந்த தருணமே

அன்பு நேசம் பாசம் காதல் என
ஒற்றை வார்த்தையில் ஒலியளிக்க முடியா
உறவளித்த என் உயிர் அணுவே!
என்றென்றும் உன் தந்தை என் மகளே!

நெறி

தனக்கு நிகழக்கூடாததை
மற்றவனுக்கு நிகழ்த்தாதே

முன்னிலையில் பேச தகாததை
எந்நிலையிலும் பேசாதே

என்றேனும் எனதில்லை என்பாயெனில்
அவ்வெண்ணங்களை விளைக்காதே

வாழ்வியல்

மாற்றோன் எண்ணப்படி வாழ்வது
உன் வழி அல்ல

உன் எண்ணப்படி வாழ்
எனினும் சார்ந்தோனை துன்புறுத்தாதிரு

மாற்றோன் எதிர்பார்ப்பதும் அதன் எதிர்மறை
செயலும் செய்யாதிரு

தர்மம் ஆச்சாரம் கருணை பயிலாதே
தானே மலர்ந்தபின் பழகியிரு

மிகினும் விளைவும்

வஞ்சம் மிகியோன் குரோதம் மறைப்பான்
இன்சொல் உரைப்பான்

பயம் மிகியோன் கடுஞ்சொல் உரைப்பான்
உறவுகள் அருப்பான்

குரோதம் மிகியோன் மதி ஒடுங்கியோன்
பல்நாள் சேமிப்பிழப்பான்

காமம் மிகியோன் கனவுகள் மறப்பான்
இலக்கினை அடையான்

லோபம் மிகியோன் காமம் தணிந்தோன்
சூழ்நலம் கெடுப்பான்